As I dey read wetin the guy the talk, I just dey laugh. Naso we go dey talk say our leaders no good, but even that small business wey you be boss, wey na you dey call the shots, naso you go dey misbehave. Look how them dey use people money dey play. First them covert am to a worthless Patricia token and now then want convert am to Patricia shares. The guy just dey cruise dey chop life and nobody don hold am accountable for him actions. Now, wey owu dey blow, this people supposed use their funds take do one or two but for months their money just dey trapped for the exchange. This one na the reason wey we dey talk say IF NOT YOUR KEYS, IT'S NOT YOUR COINS. I hope our people go learn from this.
The funny part com be say e expect customers mind to cool as e tok say their funds go dey used as shares. So in other words, them go get shares for the company bah? The tok no clear; on one hand, e dey tok say e go use am as shares, then come later say them dey do token and those users wey their funds hang go get access to the PUTX token then e come say when them begin business again, their money go dey paid in batches. Which kind confused yarn be that. You see, no mata say he sponsor BBN no mean say e get everything under control, infact e just look like wetin Sam Bank Friedman do with FTX and coupled with the kind of lifestyle wey Hanu dey keep, I feel say those funds don enter voicemail since.Another sad part about this one be say nah remote them dey operate, dem no get office which means those users funds dey at greater point of being lost than anything. This nah the reason crypto users no sopoz leave their funds for centralized exchanges because if anything happen to am, na so so grammar like this you go dey hear.
