Make we dey wait on APC primaries but i no go surprise if na Bola Tinubu emerge, i mean e go be disrespectful to him political career say party wey him start go give another person ticket wey no be am. Peter Obi na third force and e go hard am to emerge as winner, anyhow sha i just dey wish anyone wey go enter go better pass buhari and dey industrious. dis na just personal opinion.
I dy expect baba Tinubu to win am (na primaries i they talk about oh), i no want make e win am oh, but e get as Naija be, and the man strong for APC wella, Osinbajo na strong opponent too sha, and na him be incumbent vice president, so e suppose sabi as things dy go for the party. If Tinubu no win, i dy feel so e fit join another party contest, e go just dump APC, carry vex join body for another party run for president, i no know if Osinbajo go do like that if e lose, cause e no dy do like person wey power dy hungry too much. But Tinubu eyes dy red, e wan be president for this his lifetime before e go rest, i hope say that one no go happen.
As for Peter Obi, i believe say Naija eye go don open small and this election no go dy like the ones wey dy happen for past, Naija people don suppose understand say if we continue to they vote for party then nothing good go fit come, we suppose focus on the individual wey we feel say get the swag to take rule us well well, if you ask me Peter Obi na that man oh, and e suppose get strong chance come 2023, na just this one wey e no dy contest under one of the two major parties, and Naija people na party them they like vote for, but make we buy popcorn sit down see as things go pan out, and also grap your PVC oh, e dy very important.