I believe say with our PVC and our new resolve we go exodus to the promised land
My guy no believe say PVC go do anything oo as far naija system dey concern, the rigging of election na still wahala wey face d country.
I hear wetin u dey tok nai make I add say with our new resolve which means the new mindset wey we don carry we don sabi the system. Their old tricks nor fit work on us again. Shey na boys them go still carry to rig election when everybody say we nor dey go them go carry their children to go tiff ballot box
Na make them allow for independent candidate to contest. We know say as far to win president dey concern, na PDP or APC the thing dey come from and these two parties no mean well for naija because na same people.
This one nor go ever fit happen. Even for America them get political parties but how many u dey hear na only democrats and Republicans you dey see for news every time but other parties still dey. But these two na the major ones. Politics na game of power no single politician fit dey independent.
Two be say make them stop cross carpeting. Make every person stay for the political party wey them take enter office until the tenure finish. At least for America I no dey too hear these nonsense movement from Republican to Democrat vice. versa. Make dem make am at least conditional that once general election finish, no more moving out. Our government no just dey try.
For Yankee people nor dey change party anyhow because them believe in wetin their party stand for. Even for Trump administration, many Republicans way dey office nor like am personally but them still dey support the party decisions. We nor hear say them jakpa but for here every two two days na defection.
Three be say make them demonize politics. Too much money dey flow inside the politics and na that one make contestants and aspirants go sell properties to contest. You know how much be tickets, campaign rallies, bribes , wetting of hands, sharing of money, god fathers etc etc. If them spend all these money finish, where we think say them go get money replace the house and choicest properties wey dem sell, the rest na history my brother. I know say for US, some group of people, corporation, business people dey support a candidate and help them in campaign with printing of campaign stuffs etc e no be like that here , so that your road no go get attention when the money come your local government chairman (if they exist self), go wak am or take am go bring another woman, cars, house. I beg naija story plenty.
Even for US na the same thing. My guy politics na money play. See ordinary SUG for universities the kind money way them dey tiff nor be here. Come talk of those way dey senate and aso rock. This country tori don taya me make we gist better things